Income Tax TDS Return Q4: DDO-മാർ ശ്രദ്ധിക്കേണ്ട അവസാന തീയതിയും പ്രധാന വിവരങ്ങളും
2025-26 സാമ്പത്തിക വർഷത്തെ (Financial Year) നാലാം ക്വാർട്ടർ (Quarter 4) ഇൻകം ടാക്സ് TDS റിട്ടേൺ ഫയൽ ചെയ്യേണ്ട സമയമായി. സ്കൂളുകളിലെയും മറ്റ് സർക്കാർ ഓഫീസുകളിലെയും Drawing and Disbursing Officer (DDO) മാർ മെയ് മാസത്തിൽ ഏറ്റവും മുൻഗണന നൽകി ചെയ്യേണ്ട ഒരു പ്രധാന ചുമതലയാണിത്.
റിട്ടേൺ ഫയൽ ചെയ്യേണ്ട അവസാന തീയതി, വൈകിയാലുള്ള പിഴകൾ, DDO-മാർ ശ്രദ്ധിക്കേണ്ട മറ്റ് പ്രധാന കാര്യങ്ങൾ എന്നിവ വിശദമായി താഴെ നൽകുന്നു.
പ്രധാനപ്പെട്ട തീയതികൾ (Deadlines)
- Q4 TDS ഫയൽ ചെയ്യേണ്ട അവസാന തീയതി: 2026 മെയ് 31
- ഫോം 16 (Form 16) ജീവനക്കാർക്ക് നൽകേണ്ട അവസാന തീയതി: 2026 ജൂൺ 15
ഏതൊക്കെ വിവരങ്ങളാണ് ഫയൽ ചെയ്യേണ്ടത്?
2026 ജനുവരി, ഫെബ്രുവരി, മാർച്ച് എന്നീ മാസങ്ങളിൽ പണമാക്കിയ എല്ലാ ബില്ലുകളിൽ നിന്നും (ശമ്പള ബില്ലുകൾ ഉൾപ്പെടെ) ഡിഡക്ട് ചെയ്ത (Deduct) ഇൻകം ടാക്സ് വിവരങ്ങളാണ് നാലാം ക്വാർട്ടറിൽ ഫയൽ ചെയ്യേണ്ടത്.
ടാക്സ് അടയ്ക്കാത്ത ജീവനക്കാരുടെ വിവരങ്ങൾ നൽകണോ?
തീർച്ചയായും നൽകണം. ഇൻകം ടാക്സ് റ്റി.ഡി.എസ് (TDS) ആയി റിക്കവറി ചെയ്യാത്ത ജീവനക്കാരുടെ ഇൻകം ടാക്സ് സ്റ്റേറ്റ്മെന്റുകളും ഫയലിംഗ് ഏജൻസിക്ക് നൽകാൻ എല്ലാ DDO-മാരും ശ്രദ്ധിക്കേണ്ടതാണ്.
- എല്ലാ ജീവനക്കാർക്കും ഫോം 16 (Form 16 / ഫോം 130) നൽകേണ്ടതുണ്ട്.
- ടാക്സ് അടച്ചിട്ടില്ലാത്ത ജീവനക്കാരുടെ വിവരങ്ങൾ ഉൾപ്പെടെ എല്ലാ ജീവനക്കാരുടെയും കൃത്യമായ ശമ്പള വിവരങ്ങൾ TRACES പോർട്ടലിൽ ഫയൽ ചെയ്താൽ മാത്രമേ അവർക്ക് കൃത്യമായ ഫോം 16 ലഭിക്കുകയുള്ളൂ.
ഫോം 16-ന്റെ നിയമസാധുത
നിലവിലെ ഇൻകം ടാക്സ് നിയമപ്രകാരം TRACES Portal വഴി തയാറാക്കുന്ന ഫോം 16-ന് മാത്രമേ നിയമസാധുതയുള്ളൂ. ഓഫീസുകളിൽ നിന്നും മാനുവലായി തയാറാക്കി നൽകുന്ന ഫോമുകൾ ഉപയോഗിച്ച് ജീവനക്കാർക്ക് ഇൻകം ടാക്സ് റിട്ടേൺ (ITR) ഫയൽ ചെയ്യാൻ സാധിക്കില്ല. അത് ജീവനക്കാരുടെ AIS (Annual Information Statement), Form 26AS എന്നിവയുമായി മാച്ച് ചെയ്യുകയുമില്ല.
മെയ് 31 കഴിഞ്ഞാൽ എന്ത് സംഭവിക്കും? (Late Fee & Penalty)
നിശ്ചിത സമയത്തിനകം TDS റിട്ടേൺ ഫയൽ ചെയ്തില്ലെങ്കിൽ, സെക്ഷൻ 234E പ്രകാരം വൈകുന്ന ഓരോ ദിവസത്തിനും 200 രൂപ വീതം ലേറ്റ് ഫീ (Late Fee) ഈടാക്കുന്നതാണ്. ഈ തുക ഓഫീസിന്റെയോ ഡിപ്പാർട്ട്മെന്റിന്റെയോ ഫണ്ടിൽ നിന്ന് എഴുതിയെടുക്കാൻ സാധിക്കില്ല. ഇതിന് DDO വ്യക്തിപരമായി മാത്രമായിരിക്കും ഉത്തരവാദി.
DDO-മാർ ചെയ്യേണ്ട പ്രധാന കാര്യങ്ങൾ:
- PAN പരിശോധന: എല്ലാ ജീവനക്കാരുടെയും പാൻ കാർഡ് നമ്പറുകൾ കൃത്യമാണെന്ന് ഉറപ്പുവരുത്തുക. തെറ്റായ പാൻ നൽകിയാൽ ടാക്സ് ക്രെഡിറ്റ് ജീവനക്കാരന് ലഭിക്കില്ല.
- ചലാൻ വിവരങ്ങൾ മാച്ച് ചെയ്യുക: ജനുവരി, ഫെബ്രുവരി, മാർച്ച് മാസങ്ങളിൽ ട്രഷറി/ബാങ്ക് വഴി അടച്ച TDS ചലാനുകൾ കൃത്യമായി മാച്ച് ചെയ്യുന്നുണ്ടെന്ന് ഉറപ്പാക്കുക.
- കൃത്യസമയത്ത് ഫയൽ ചെയ്യുക: ഓഫീസ് മുഖേന നേരിട്ടോ, അല്ലെങ്കിൽ ഇൻകം ടാക്സ് ഫയലിംഗ് ഏജൻസി വഴിയോ മെയ് 31-നകം തന്നെ റിട്ടേൺ സമർപ്പിക്കാൻ DDO-മാർ പ്രത്യേകം ശ്രദ്ധിക്കുക.